اروا پوهنه د ساینس په توګه

اروا پوهان په مختلفو ځایونو کې دندې لري، د څېړنو لپاره مختلفې طریقې کاروي خو ټول بیا خپله کې ګډ یو څه لري او هغه په ساینسي طریقې تکیه ده. د څېړنو اروا پوهان د چلند د لاملونو پیدا کولو لپاره ساینسي طریقې کاروي. خو کوم اروا پوهان چې په ښونځیو، کلینیکونو، روغتونونو، صنعتي ادارو کې کار کوي د څېړونکو اروا پوهانو څېړنې کاروي تر څو د نورو کسانو ژوند کې ستونزو ته د حل لارې ولټوي. پورته دواړه ډوله اروا پوهان باید د اروا پوهنې په ساینس پوه وي.

ټول انسانان غواړي د نړۍ د هر څه په اړه پوښتنه وکړي، ټول انسانان غواړي د خپلې پوهې له کچې سره برابر پوښتنې ځواب کړي، ټول انسانان غواړي په دې پوه شي چې پېښې ولې کیږي، کله پېښې کیږي او بیا به هم وشي او که نه ؟ دا ډول پوښتنې او ځوابونه مونږ ته د خپل او د نورو دچلند په اړه د وړاندوینې وړتیا راکوي. له همدې امله هر کس یو ډول څېړونکی ساینس پوه دی، هر کس څېړنې پیل کوي پوښتنې کوي او خپلو پوښتنو ته ځواب مومي او د وګړو دا چاره په خپله یو ډول څېړنه ده. د بېلګې په توګه که چېرې یوه ازموینه کې یو زده کوونکی ناکام شي نو سمدلاسه فکر کوي چې څه د نه زده کېدو لامل شوي وو، څه د ناکامېدو لامل شو، څه به مرسته وکړي چې بل ځل یې سم زده کړم او بریالۍ ازموینه ولرم ؟ همداسې که تاسې یوه داسې جوړه ووینی چې ډېر ښه خوښ ژوند سره لري او دا جوړه نا څاپه طلاق سره واخلي هر مرو به دا پوښتنه درته پیدا کیږي چې څه پېښ شول، څه د طلاق لامل شو؟ که چېرې په نړۍ کې یوه ډله تاوتریخوالی کول غواړي هرو مرو به یې چاپېریال ته نظر کوئ، د دوي په انګېزو به د پوهېدو هڅه کوئ چې دا ډله ولې ځان او بل وژل غواړي ؟ او دې ډول چارو ته یې نور څه ډول غبرګون ښي ؟