Frenum – په خوله کې غشایي چین
په انګرېزۍ کې ورته (frenulum) نوم هم اخلي. د خولې پاسه او لاندې برخه کې او همداسې د دواړو شونډو د بیخ او ووریو ترمنځ د نرمو نسجونو پردې ته ورته شکل دی. د ژبې لاندې هم موجوده ده. په هر کس کې یې ډبلوالی او اوږدوالی توپیر لري. که چېرې وینې شي زیاته وینه ترې بهیږي خو د وینې کېدو پر وخت که خوله پاکه وساتل شي نو کومې درملنې ته اړتیا نلري. که چېرې څو ځلې پرې یا وینې شي نو ممکن د غاښونو ډاکټر یا د خولې جراح یې د عملیات له لارې پرې کړي او دې ډول عملیات ته په انګرېزۍ کې (frenectomy) نوم اخلي.
په خوله کې دوه ډوله غشايي چین موجود دی :
یو ډول ته (Lingual frenum) نوم اخلي
دا پردې د ژبې د لاندې خوا بیخ د خولې له سطحې سره وصل کوي. که چېرې شخه شي یا ونیول شي د ژبې نیول کېدنه یا غوټه کېدنه (tongue tie) ورته وایي او دا حالت د ژبې پر خوځښت اغیز کوي.
بل ډول ته یې (Labial frenum) نوم اخلي
دا ډول غشایي پردې د خولې په مخې کې واقع دي او د پاسه او لاندې شونډو د بېخ او ووریو ترمنځ وي. که چېرې په دې غشایي پردو کې ستونزه رامنځته شي نو د غاښونو په جوړښت کې مو ناسموالی رامنځته کیږي او که چېرې کش وخوري نو وورۍ له غاښ څخه جلا کولای شي او د غاښونو ریښې راڅرګندوالی شي.
د غشايي چین بې نظمۍ
یادې پردې ژبه او شونډې په خوله کې با ثباته ساتي. که چېرې ناسمه وده وکړي نو خولې کې ستونزې پیدا کولای شي لکه :
د خولې د غړو په وده کې ستونزه؛
د خوړو تېرولو پر وخت نا ارامي؛
د مخې خوا پورته دوه غاښونو تر منځ واټن پیدا کېدل ؛
د همدې غشايي پردو وېنې کېدنه؛
د شونډو یا ژبې نیول کېدنه؛
د خوب پر وخت خرېدل او د پوزې پر ځای په خولې سا اخیستل، لامل یې د ژامو نا سمه وده وي؛
په خبرو کولو کې ستونزه؛
د ژبې بشپړ پراخولو وړتیا نلرل.
د دې پردو جراحي ته فرېنېکټومي (frenectomy) نوم اخلي او په دې جراحي کې د دې پردې له امله په خوله کې ټول بدلون نورمال حال ته بیول کیږي او دا پرده پکې پرې کیږي. د دې جراحي سپارښتنه هغه وخت کیږي چې د خولې جوړښت یې ناسم کړی وي او یا هم هر وخت وینې کیږي. ډېر وخت د هغو کوچنیانو فرېنېکټومي کیږي چې د مور شېدې نشي رودلی او یا هم خبرې نشي کولای. د جراحي لپاره یوازې همدې سیمې ته انېستیزي ورکول کیږي او رغېدنه یې هم څو ورځې وخت نیسي. د جراحي لپاره ممکن کوچنی چاقو وکارول شي، ممکن الیکټرو سرجري وي او یا هم لایزر پکې وکارول شي. کله چې د پردې کومه برخه پرې کړي له پرې کولو وروسته یې ممکن کوک کړي. له جراحي وروسته باید ژبه تر رغېدو بې کچې ونه خوځول شي او د پړسوب ضد درمل ورکړل شي.
Comments
So empty here ... leave a comment!