Olympe de Gouges – د ګوژ اولیمپ

اصلي نوم یې ماري ګوژ وو. د ۱۷۴۸ کال د مې په ۷ نېټه زېږېدلې او د ۱۷۹۳ کال د نومبر په ۳ نېټه مړه شوې. د کیسو لیکونکې او سیاسي فعاله وه. “د ښځو د حقونو او ښځینه ښاریانو اعلامیه” یې یوه لیکنه وه کومې چې د ډېرو خلکو پام خپل کړ خو له دې پرته یې د ښځو په حقونو او د غلامۍ ضد نورې لیکنې هم خپرې شوي.

د فرانسې په سوېل لوېدیځ کې زېږېدلې او په ۱۷۸۰ لسیزه کې یې د کیسو لیکونکې په توګه پاریس کې په لیکنو پیل کړی. د انساني حقونو مدافع او په فرانسه کې یوه تر ټولو لمړۍ مېرمن چې د غلامي ضد یې مبارزه پیل کړې. په خپلو کیسو کې یې مختلف ډوله موضوعات رانغښتي وو لکه واده او طلاق، د ماشومانو حقونه، بې کاري او ټولنیز امنیت او داسې نور، … سره له دې چې سیاسي فعاله او د کیسو لیکواله وه د فرانسې له انقلاب مخکې یې اداکاري هم کوله. په پیل کې یې د فرانسې د انقلاب ملاتړ وکړ خو له انقلاب وروسته چې کله ښځو ته حقونه ورنکړل شول نو له انقلاب نا هیلې شوه. په ۱۷۸۹ کال کې حکومت د نرانو د حقونو او نارینه ښاریانو اعلامیه خپره کړه د همدې اعلامیې په غبرګون کې اولیمپ په کال ۱۷۹۱ کې د ښځو د حقونو ښځینه ښاریانو اعلامیه خپره کړه.

له انقلاب وروسته چې کله د شپاړسم لویي پاچایي نسکوره شوه نو جیرونده ډلې سره یوځای او د پاچا له اعدام کولو سره یې مخالفت وکړ. په خپلو لیکنو کې یې د مکسیمیلین روبېسپیر په انقلابي حکومت کلکې نیوکې پیل کړې او ګمان کیږي چې له همدې امله روبېسپیر په ۱۷۹۳ کې ونیوله او سره یې ترې قلم کړ.